About us

Бинандагони гиромии «isloh.TV«!  Доштани мисли шумо ҳаводору муштарӣ моро водор мекунад,ки беш аз пеш саъю талош кунем, то хоста ва тавақуъоти шумо бароварда бишавад. Афзоиши шумораи шумо дустони азиз, ки сидқан ҳамроҳи мо ҳастед ва низ онҳое,ки ба мо назари хуб надоранд, моро намегузорад, ки такопуву ҷустуҷуҳои худро кам кунем, баракс таҳрик медиҳад,ки кори бештар кунем.
Чуноне худи шумо ҳам мушоҳида намудед Ислоҳ минбари озоду новобаста аст ва ҳақиқату воқеиятро мегӯяду менависад. Аз ин сабаб аст, ки дар шабакаи маҷозии тоҷикӣ ҷойгоҳи хоси худро ишғол кардааст.
 Дар ҳафтсоли фаъолияти худ, ки ба хотири гуфтани сухани ҳақ ва ошкор сохтани ҷиноятҳои мақомот борҳо мавриди ҳамлаҳои ҳакерӣ ҳам қарор гирифтем,ҳеҷ гоҳ аз ин роҳ мунсариф нашудем,чунки қудрат ва бозувони тавонои шумо муттакои мост ва ба ҷуз аз Худо ва шумо пеши касе ҳисобот намедиҳем. Мо дар иҷрои масъулият ва кори худ мустақилем.
Ислоҳ тули ин ҳафт сол тавонист, ки симо ва чеҳраи воқеии хеле аз онҳоеро, ки худро дигаргуна вонамуд мекарданд,намоён созад. Бар алайҳи ҷиноятҳои бузрге чун, коррупсия, гардиши ғайриқонунии маводи мухаддир, аҳкоми ғайриодилона дар додгоҳҳо, вазифаву мансабфурушӣ,умуман нақзи ҳуқуқҳои шаҳрвандон матолиби зиёдеро ба нашр расонд. 
Ҳам «Минбари муҳоҷир» ва ҳам «Номаҳо аз ноҳияҳо ва ҳам матолиби таҳлилии «Ислоҳ», аз ҷониби шумо дустону ҳаводорон бо истиқболи гарм рӯбарӯ мешаванд.
Тамоси мо бо дохили кишвар,бо муҳоҷирони корӣ дар ақсо нуқоти ҷаҳон ва бахусус Русия ҳамешагист ва рӯзона садҳо нома ва паёмҳо гуногун ба мо мерасанд. Онҳо нашр мешаванд.
Ба як ҷумла хидмат ба шумо ҳамватанони гиромӣ,ҳамроҳ будан бо шумо ва махсусан ҳамроҳии шумо барои мо мояи ифтихор аст!
 Маъмурияти Пойгоҳи «Ислоҳ.нет«